Mangingisda

Nakatingin s’ya sa malayo
Waring may tinatanaw
Banayad ang mga alon na humahampas sa dalampasigan
Kagabi lang ay pumalaot ang kanyang asawa

Nagsisidatingan na ang mga bangka
Ngunit hindi n’ya pa rin maaninag ang kanyang hinihintay
Parang kinukurot ang kanyang puso
“Huwag naman sana,” sabi n’ya sa sarili

Banayad ang mga alon na humahampas sa dalampasigan
Ang mga mumunting liwanag ng mga bituin
Ay unti-unting napaparam ng pasulpot na sinag sa silangan

Banayad ang mga alon na humahampas sa dalampasigan
Wala namang madilim na ulap
Ngunit parang dagundong ng kulog ang kanyang pangamba
Na para bagang may unos na parating...

Labandera

Sugatang mga daliri
Pupod na mga kuko
Kulubot na mga kamay
Sa maghapon na trabaho

Bula ng sabon
Sa maruming pantalon
May bahid pa ng lipstick
Hindi naman galing sa labi ng amo niyang babae

“Hoy, tapusin mo na yan!”
Sigaw ng misis na malaki ang tiyan

Isang daang piso sa maghapon na trabaho
Kulang pang pambili ng pulutan ng asawang lasengo

“Anak, umutang ka muna
ng sardinas diyan sa may kanto…”